అనుమానం పెనుభూతమై... భార్యను కారుతో తొక్కించి చంపిన భర్త

కర్ణాటకలో అత్యంత దారుణమైన ఘటన చోటుచేసుకుంది. కట్టుకున్న భార్యను ఓ భర్త అత్యంత కిరాతకంగా హతమార్చాడు. నడిరోడ్డుపై జుట్టు పట్టుకుని కొట్టి, ఆ తర్వాత కారుతో తొక్కి చంపేశాడు. ఈ అమానవీయ ఘటన కలబురగి జిల్లాలో గురువారం ఉదయం జరిగింది. సీసీటీవీలో రికార్డయిన ఈ దృశ్యాలు అందరినీ దిగ్భ్రాంతికి గురిచేస్తున్నాయి.

వివరాల్లోకి వెళితే, మహారాష్ట్రలోని బరామతికి చెందిన అక్షయ్, షైలా (28) దంపతులు. వీరికి నాలుగేళ్ల క్రితం వివాహమైంది. గురువారం ఉదయం వారు పుణ్యక్షేత్రమైన గణగాపుర వెళ్లేందుకు మారుతి ఎర్టిగా కారులో బయలుదేరారు. కలబురగి సమీపంలోని బల్లూర్గా గ్రామ శివార్లలోకి రాగానే ఉదయం 11 గంటల సమయంలో భార్యాభర్తల మధ్య గొడవ మొదలైంది.

దీంతో ఆగ్రహానికి గురైన అక్షయ్, భార్య షైలాను కారులోంచి బయటకు తోసేశాడు. అనంతరం ఆమె జుట్టు పట్టుకుని నడిరోడ్డుపైనే విచక్షణారహితంగా కొట్టాడు. షైలా కేకలు వేయడంతో అటుగా వెళుతున్న వారు జోక్యం చేసుకుని అక్షయ్‌ను అడ్డుకున్నారు. ఆమెను తిరిగి కారులో ఎక్కించారు. అయితే, కాసేపటికే అక్షయ్ కారును సమీపంలోని ఓ పొలం వైపు మళ్లించాడు. అక్కడ మళ్లీ షైలాను బయటకు నెట్టి, ఆమెపై నుంచి కారును నడిపి అతి దారుణంగా చంపేశాడు.

భార్య షైలాకు వివాహేతర సంబంధం ఉందనే అనుమానంతోనే అక్షయ్ ఈ ఘాతుకానికి పాల్పడినట్లు ప్రాథమిక దర్యాప్తులో తేలింది. ఈ ఘటనపై కలబురగి ఎస్పీ అద్దూరు శ్రీనివాసులు మాట్లాడుతూ, “నిందితుడిని అరెస్ట్ చేశాం. అన్ని కోణాల్లోనూ కేసును దర్యాప్తు చేస్తున్నాం” అని తెలిపారు. పోలీసులు అక్షయ్‌పై కేసు నమోదు చేసి విచారణ కొనసాగిస్తున్నారు.